جینے کی جب تمنا و تدبیر نہ رہی

سلمان ملک فائز بلرامپوری شعروسخن

جینے کی جب تمنا و تدبیر نہ رہی

پائے حیات میں کوئی زنجیر نہ رہی


اب اور حسن ِ زیست کا امکاں نہیں رہا

اب اور مجھ میں قوتِ تقصیر نہ رہی


اس دشت ِآرزو میں بھٹکتا ہوں اس طرح

جیسے کہ مجھ پہ گردشِ تقدیر نہ رہی


اب میری بے نیازی کا چرچا نہ ہو کہیں

اب میری عجز باعث توقیر نہ رہی


ہم آج بھی ہیں قابل ِ ضبط ِ غم ِ حیات

پر وقت کی کماں میں کوئی تیر نہ رہی


اس جلوہ گاہ ِخواب کی وسعت کےباوجود

شاید ہمارے خواب کی تعبیر نہ رہی


آدابِ بزم تب تھے سزاہائے جرم ِ عشق

اب جرمِ عشق کی کوئی تعزیر نہ رہی


تہذیب ،حسن ِ خلق ، شرافت ،محبتیں

اجداد کی وہ ایک بھی جاگیر نہ رہی


دل میں رہی نہ کوئی تمنائے چشم ِ ناز

آنکھوں میں حسن ِ یار کی تصویر نہ رہی


دست ِ طلب کو چاہیے تکمیل ِ آرزو

حرف ِ دعا کو حاجت ِ تاثیر نہ رہی


زیبائشوں کے ساز سبھی ہیں بہم مگر

فائز غمِ حیات کی تصویر نہ رہی

1
آپ کے تبصرے

3000
1 Comment threads
0 Thread replies
0 Followers
 
Most reacted comment
Hottest comment thread
1 Comment authors
newest oldest most voted
خبیب حسن

خوب برادرم❤️❤️