رب بیاں کرتا ہے عظمت آپ کی
سب سے اعلی ہے نبوت آپ کی
چاند دیکھوں یا میں چہرہ آپ کا
چاند سے بڑھ کر ہے صورت آپ کی
پڑھ لو قرآں! عائشہؓ نے یہ کہا
پورا ہے قرآن سیرت آپ کی
رب نے خود یہ کہہ دیا ہے مومنو!
پوری امت پر ہے رحمت آپ کی
آپ ہیں صادق امیں سب نے کہا
کتنی اعلی ہے صداقت آپ کی
رب نے بخشا آپ کو ایسا مقام
ہر اذاں میں ہوتی مدحت آپ کی
دل سے چاہت تم مٹا سکتے نہیں
جاگزیں ہے مجھ میں الفت آپ کی
ہے کھلا دشمن وہ رب کا بالیقیں
جس کے دل میں ہے عداوت آپ کی
التجا ہے رب سے اظہرؔ کی یہی
خلد میں ہو بس رفاقت آپ کی
آپ کے تبصرے