غم کے ٹھہرے ہوئے دریا کو روانی دے دے
مرے اللہ مری آنکھ میں پانی دے دے
قصۂ درد بھلاؤں تو بھلاؤں کیسے؟
کوئی دلکش مرے ماضی سے کہانی دے دے
دل یہ موسیٰ کی طرح تجھ سے دعا کرتا ہے
مجھ کو ہارون سا اک طرز بیانی دے دے
دل کے شب زاد اندھیروں میں اگادے سورج
ڈوبتی آنکھ کو اک شام سہانی دے دے
آج پھر ارض فلسطین لہو تھوکتی ہے
وقت کی گود کو فاروق کا ثانی دے دے
اب بچانا ہے تو خود قبلۂ اول ہم کو
کوئی پیغام فرشتوں کی زبانی دے دے
ایک مدت سے بھٹکتے ہیں جگر میں نالے
اب تو آہوں کو مرے نقل مکانی دے دے
اب ضرورت ہے کہ تاعرش ندا جائے خدا
جذبۂ امت مسلم کو جوانی دے دے
آپ کے تبصرے