سحر کی تیرگی سے روشنی کا باب لے آتے
مری مجروح راتوں کے شکستہ خواب لے آتے
بہت تنہائیاں ہیں اس بھری دنیا کی محفل میں
تم اپنے ساتھ ذکرِ حلقہ احباب لے آتے
کسی مغموم فاقہ کش کے ہونٹوں کا تبسم ہی
مری خاطر بہ شکلِ تحفہ نایاب لے آتے
نہ لاتے ان کا پیغامِ مسرت، ہاں نہیں لاتے
مگر اے کاشِ تصویرِ رخِ مہتاب لے آتے
وہی خبرِ تغافل، بے دلی، پیغامِ بیزاری
کوئی سامانِ تسکینِ دلِ بے تاب لے آتے
تمھیں بھی ہم نواؤ! گفتگو کا ڈھنگ آجاتا
جو تم بھی میکدوں سے کچھ ادب آداب لے آتے
مجھے جینے نہیں دیتی ہے، میری آرزوئے دل
مرے چارہ گرو! اک پیالہ زہرآب لے آتے
آپ کے تبصرے