کدھر ٹھہرے

کاشف شکیل شعروسخن

ہجوم رنج میں کوئی تو چارہ گر ٹھہرے

شراب رکھ دے جہاں بھی مری نظر ٹھہرے


جمال یار کی حدت نے وہ کمال کیا

مرے وجود کے ذرے سبھی شرر ٹھہرے


تم آؤ آ کے چلے جاؤ کوئی بات نہیں

تمھارا گھر نہ سہی دل تو رَہ گزر ٹھہرے


تمھی تمنا ہو ہر دم لہو کی گردش کی

جو تم نہیں تو یہ دل آخرش کدھر ٹھہرے


جو مجھ کو چھوڑ کے جاتے ہو تو بتا بھی دو

تمھارے بعد کہاں کون ہم سفر ٹھہرے


تمھاری بحر سی آنکھوں میں ہیں ہزار صدف

جو شخص ان میں سما جائے وہ گہر ٹھہرے


تمھارے حسن کے آتش کدے میں ہم پیہم

جلے ہیں ایسے کہ بس خاک بے شرر ٹھہرے


خموش ہی رہو کاشف! نظامِ عالم ہے

یہاں زبان جو کھولے وہ فتنہ گر ٹھہرے

آپ کے تبصرے

3000