الوداعی نظم
برائے طلباء جامعہ محمدیہ منصورہ مالیگاؤں
شعور و فکر و آگہی کے میر کارواں چلو
اٹھو کہ اے پیمبر پیام جاوداں چلو
محافظ حرم چلو حرا کے ترجماں چلو
شریعت رسول مصطفی کے پاسباں چلو
چلو کہ راہ شوق کے تمھی تو اک امین ہو
ہر ایک خواب سربکف کے تم ہی جاں نشین ہو
تم اعتماد صبح ہو سحر سے تم یقین ہو
مسافر زمیں چلو مکین لامکاں چلو
اٹھو جو گرد دامن وجود پہ ہے جھاڑ دو
ورق ورق کتاب داستان سوز پھاڑ دو
حریم جبر توڑ دو فصیل غم اکھاڑ دو
اٹھو اے عظمت سلف کے آخری نشاں چلو
جو زخم شوق تھے کبھی وہ زخم آج بھر گئے
کہ تم بھی اب تو خواب حسن و عشق سے گزر گئے
فصیل دہر سے رداء معتبر اتر گئے
سمیٹو غم کے پیرہن بہ سوزش نہاں چلو
تم آج اپنا دامن شکستہ خواب نوچ لو
رخ فریب و مکر سے اٹھو نقاب نوچ لو
جو ہوسکے تو آسماں سے آفتاب نوچ لو
بہ نقش کہکشاں چلو بقد آسماں چلو
ہوں منزلوں سے مطمئن وہ رہ نورد ہم نہیں
ہمارے شوق و ولولے ابھی اگر بہم نہیں
تو پاؤں کی جراحتیں بھی حوصلوں سے کم نہیں
ابھی ہیں راہ جستجو میں اور امتحاں چلو
چمن چمن کلی کلی نشاط برگ و بار ہے
یہ شاخ شاخ خوشبوء تبسم بہار ہے
تمھارے ہی سبب فضاء دہر مشک بار ہے
اے ناز برگ و و گل چلو اے رشک گلستاں چلو
مقام ہجر سے چلو دیار وصل کی طرف
اِس عارضی قیام سے مقام اصل کی طرف
اداس موسموں سے اک حسین فصل کی طرف
پئے حزین برگ وگل نسیم گل فشاں چلو
خدا تمھیں وہ سیرت جمیل دے جلال دے
زمانہ جس کی عظمت وقار کی مثال دے
تمھاری صوت کو خدا ترنم بلال دے
منارہ بصیرت و نظر کی اے اذاں چلو
رخ بوبکر و طلحہ و نسیم سے ہو روشنی
مٹے نقوش پاء سیف و مجتبی سے تیرگی
فیروز ساحل و حسین و علقمہ سی بندگی
اٹھو اے ہم نوااٹھو چلو اے مہرباں چلو
صداقت خلیل سے ہر ایک دل شناس ہو
عتیق راہ حریت سے آپ روشناس ہو
مکائل و ریان و عبد آج کیوں اداس ہو
اے غم گسار دل چلو اے چارہ ساز جاں چلو
ملک ابو حذیفہ و شعیب کو نواز کر
خدا علوم و فن سے قلب و جاں کو سرفراز کر
قلوب عرفتین کو بھی محرم گداز کر
قدم قدم پہ چھوڑتے نقوش داستاں چلو
نفع ہو عبد نافع کا بھی کاروبار زیست میں
ملے گہر، صدف انھیں رہ غبار زیست میں
ہو منزل سکوں تمھارا سبزہ زار زیست میں
اٹھو کہ اب بصورت چراغ ضو فشاں چلو
تو فیصل آج فیصلہ ہو صبح و شب کے درمیاں
کسے سحر پہ ناز ہے، ہے کون نازش جہاں
عبید و عرفاں، بن زبیر عدل کے ہیں ترجماں
تو ترجمان حق اٹھو اے منصف جہاں چلو
ہوں بن صغیر، ابن یوسف اور بن سلام الدیں
بن اجمل، بن منور اور عبد رحماں ہم نشیں
مصدق و تنویر اور عمار ہوں نہ اب حزیں
اے ملت رسول مجتبی کے نوجواں چلو
یہ زندگی تو رزم گاہ تیرگی و نور ہے
وہی ہے فیض یاب روشنی جسے شعور ہے
ابھی تو منزل مبارک و شعیب دور ہے
اے حارث ضیاء چلو وفا کے رازداں چلو
سخن شناس تم بنو بطرز غالب وامیر
بہ روش حالی و فضا بہ نقش پائے داغ و میر
ہوں مطمح نظر تمھارے ناسخ و جگر، دبیر
بکھیرو خوشبوء سخن جدھر چلو جہاں چلو
اے درسگاہ فکر و فن تجھے سلام الوداع
اے قلب و جاں کی انجمن تجھے سلام الوداع
اے فخر ملت و وطن تجھے سلام الوداع
سلام الوداع بلب چلو اے ہم زباں چلو
ماشاءاللہ 🌹 بہت ہی کمال کی نظم ہے سلمان بھائی
اللہ آپ کے علم و قلم کو مزید عروج بخشے ، جیتے رہو ، لکھتے رہو