اے مرے پاک پیمبر اے شہ جن و بشر
نہیں دنیا میں کوئی تیرا نظیر و ہمسر
تو مری جان، مری شان مری عزت ہے
میرا ایمان، مرا مان، مری نسبت ہے
میرا سمّان مرا گیان مری دولت ہے
اہل اسلام کا اکلوتا ہے تو ہی دل بر
اے مرے پاک پیمبر اے شہ جن و بشر
قطرہ قطرہ ہے جہاں اور سمندر ہے تو
اہل ایماں کے لیے ساقی کوثر ہے تو
ہم گنہگار ہیں اور شافع محشر ہے تو
سارے انسانوں کا جنوں کا تو ہی ہے رہبر
اے مرے پاک پیمبر اے شہ جن و بشر
ترے طیبہ کی زیارت ہی سعادت ہے مری
تیری ہر آن غلامی میں سیادت ہے مری
ذکر کرنا ترا ہر دم یہی عادت ہے مری
سارے عالم میں نہیں کوئی بھی تجھ سے بہتر
اے مرے پاک پیمبر اے شہ جن و بشر
اے مبشر، اے معلم اے رسول رحمت
جانِ احسان، خوش انداز، سراپا رأفت
تو محبت، تو شرافت، تو مکمل برکت
حشر میں تیری شفاعت سے سنور جائے سفر
اے مرے پاک پیمبر اے شہ جن و بشر
ایک اک بات تری وحی خدا ہوتی ہے
ساری مخلوق کو خالق کی ندا ہوتی ہے
بات حق ہی ترے ہونٹوں سے ادا ہوتی ہے
تجھ پہ قربان ہیں کاشف کے دل و جان و جگر
اے مرے پاک پیمبر اے شہ جن و بشر
بہت پیاری نعت ماشاءاللہ