سفر سفر نہ رہا دشت ناگہاں سا رہا

ہماری آنکھوں کے آگے دھواں دھواں سا رہا

---

میں اس کو دیکھ کے کچھ دیر تک رہا خاموش

پھر اس کے بعد خیالوں کا امتحاں سا رہا

---

کسی کے ہونے سے کھلتا ہے راز بود و نبود

مکیں رہے نہ تو دل بھی کہاں مکاں سا رہا

---

بس ایک لمحے کی غفلت کا یہ نتیجہ تھا

میں انتظار کی آنکھوں میں رائیگاں سا رہا

---

تری جدائی کے مقتل میں بچ گئی جاں جب

بدن میں روح نہ ہونے کا پھر گماں سا رہا

---

ہزار قسم کے غم قطرہ قطرہ جمع ہوئے

مآل غم شب فرقت میں خوں فشاں سا رہا

---

جگر میں درد برائے سیاہی بھرتے رہے

قلم کا حال سر صفحہ خونچکاں سا رہا

---

کبھی چراغ بجھا اور کبھی خزاں آئی

مزار دل میرے سینے میں بے اماں سا رہا