حرف کو خط و خال دے اللہ!
گفتگو کا کمال دے اللہ!
تیری رحمت سے جو کرے مایوس
اس مصیبت کو ٹال دے اللہ!
میرے دل میں غرور آ جائے
مجھ کو اتنا نہ مال دے اللہ!
اپنی قدرت کا یوں کرشمہ دکھا
مجھ کو حیرت میں ڈال دے اللہ!
تجھ کو راضی نہ میں کروں جب تک
مجھ کو تب تک ملال دے اللہ!
چاہے تیرا جواب کچھ بھی ہو
مجھ کو اذنِ سوال دے اللہ!
حرص، خوفِ قضا، تکبر، لہو
میرے دل سے نکال دے اللہ!
میرے دل کو بنا دے آئینہ
روح کو بھی جمال دے اللہ!
کاسۂ ذہنِ شادؔ میں ہر دم
بس تو اپنا خیال دے اللہ!
آپ کے تبصرے