گزر رہی ہے جدائی جو تجھ پہ شاق تو دیکھ

کبھی کبھی تُو ورائے حد فراق تو دیکھ

---

مری طلب نہ سہی میرا اشتیاق تو دیکھ

عبارتوں سے پرے آ، ذرا سیاق تو دیکھ

---

جدا ہیں جسم ہمارے، جدا ہیں رنگ و روش

تو ان کو چھوڑ کے روحوں کا التصاق تو دیکھ

---

تو اختلاف کی ساری حدیں بھلا تو سہی

تو اختلاف پہ ہم سب کا اتفاق تو دیکھ

---

کٹے ہے وقت، بھلے مجھ کو کاٹ کر ہی کٹے

اٹوٹ غم ہے۔ غموں کا یہ طمطراق تو دیکھ

---

وہ ہے مریض جو ہر دم متین رہتا ہے

کبھی مزاح تو سن اور کبھی مذاق تو دیکھ

---

وہ میٹھے بول حقیقت میں زہر قاتل ہیں

تو اس نقاب کے پیچھے چھپا نفاق تو دیکھ

---

یہ ہجر ہجر نہیں ہے کوئی قیامت ہے

یہ چشم تر نہ سہی دل کا انشقاق تو دیکھ

---

ہوئے ہیں حسن کے ورثاء تمام بیگانے

ہے خالی ہاتھ یہ کاشف شکیل عاق تو دیکھ