زمانہ گوش بر آواز ہے ولیؔ چپ ہے

رگوں میں دوڑ رہی تھی جو زندگی چپ ہے

---

سراپا تقوی و عزم و عمل تھی اس کی ذات

رواں تھی نبضِ عمل میں جو سادگی چپ ہے

---

بہت ہی ناز تھا جس پر تجھے زبانِ عرب!

وہ علم وفضل کا پیکر وہ آگہی چپ ہے

---

زباں عرب کی تھی بھارت میں ضوفشاں جس سے

وہ نور بجھ گیا دیکھو! وہ روشنی چپ ہے

---

جو ناخدائے زبانِ عرب تھا دہلی میں

وہ جس کے پیچھے تھا اک کارواں، وہی چپ ہے

---

یہ اپنے اپنے مقدر کی بات ہے یارو

وہ دیکھو بول رہا ہے کوئی ، کوئی چپ ہے

---

کہاں سے لائیں گے آبِ زُلال تشنہ بہ لب

خموش علم کا دریا ہے تشنگی چپ ہے

---

نفاق وکینہ وبغض وحسد سے پاک تھا جو

خلوصِ قول وعمل کی وہ چاشنی چپ ہے

---

زبانِ دل سے جو کرتا تھا گفتگو ، اس کے

سخن کی تازگی اور لب کی نازکی چپ ہے

---

سروں پہ آج وہ ٹوٹا ہمارے کوہ الم

غموں کی دھوپ برستی ہے اور خوشی چپ ہے

---

سراپا درد ہے ہر شخص اس کی رحلت سے

سخن خموش ، زباں گنگ ، آدمی چپ ہے

---

الٰہی اخترِ ندوی کا ہر عمل ہو قبول

اب اس کا دفترِ اعمال دنیوی چپ ہے

---

میں آج شمسؔ لکھوں کیسے منقبت اس کی

قلم ہے سکتے میں میرا ، زباں مری چپ ہے