عہد ستمگری میں نہ جاں کی اماں ملی
یہ جرم ہے ہمارا ہمیں کیوں زباں ملی
چہرے کی ہر لکیر میں اِک داستاں ملی
بین السطور کرب میں ڈوبی فغاں ملی
شمشیرِ ظلم و جبر سے کاٹی گئی زباں
مظلوم وبے قصور کی جو ترجماں ملی
دشمن کو پست کرنا کوئی معرکہ نہیں
ہم سے ہماری قوم مگر بدگماں ملی
محلوں میں جشن عید منایا گیا مگر
ہرجھوپڑی غریب کی نوحہ کناں ملی
ہم نے سنا تھا لوگ فرشتہ صفت بھی ہیں
انسانیت کی خُو بھی کسی میں کہاں ملی
حالانکہ دلنشیں تھا بہت رنگِ باہری
رنگت مگر عجیب درونِ مکاں ملی
دنیاوی تجربات کا ماہر تھا جو بشر
دیکھا تو اس کی پشت بمثلِ کماں ملی
آپ کے تبصرے